Kide Urgazle Gazteak izendatu ditu Jakiundek

Jakiundek hamar jakitun urgazle gazte izendatu ditu azaroaren 11n Bergaran egindako Bilkuran:

- Nora Alonso Casajús (Biologian doktorea, Idenbiotechnology bioteknologia-enpresako sustatzaile-kidea, sortzailea eta zuzendaria, Nafarroa)

- Ignacio Arganda-Carreras (Informatikan eta Ingeniaritza Elektrikoan doktorea, Ikerbasqueko ikertzailea, UPV/EHU, Gipuzkoa)

- Lourdes Basabe-Desmonts (Kimikan doktorea, Ikerbasqueko ikertzailea, UPV/EHU, Araba)

- Nuria Cano (Antropologian doktorea, UPV/EHU, Gipuzkoa)

- Naroa Ibarretxe (Medikuntzan doktorea, neuropsikologoa, Deustuko Unibertsitateko irakaslea eta ikertzailea, Bizkaia)

- Igor Ijurra (Zuzenbidean lizentziaduna, Musikako Goi Mailako Tituluduna Abesbatz zuzendaritzan espezialdua. Iruñeko Orfeoiko zuzendaria, Nafarroa)

- Jon Maya (Kazetaritzan lizentziaduna. Dantzaria eta koreografoa, Kukai taldeko zuzendaria, Gipuzkoa)

- Oihana Otaegui (Ingeniaritza Industrialean doktorea, Garraio Inteligenteen Sistemen eta Ingeniaritzaren Saileko zuzendaria Vicomteck-IK4chn, Gipuzkoa)

- David Pardo Zufiaur (Matematika Aplikatuan doktorea, Ikerbasqueko BCAMeko irakasle ikertzailea, EHU, Bizkaia)

- Mikel Santesteban (Hizkuntzalaritzan doktorea, Ramón y Cajal irakasle-ikertzailea, EHU, Araba)

Jakiunderen xedea zientziak, arteak eta letrak sustatzea eta zabaltzea da, kalitatean eta bikaintasunaren bilaketa nabarmenduz, eta, horretarako, komunitate zientifikoaren, artistikoaren literarioaren eta gizarte osoaren erronkei buruz hausnartzeko, aztertzeko, diagnostikoa eta aholkularitza emateko foro bat osatzen du. Horrenbestez, Akademiak erabaki du helburu horiek lortzeko beharrezkoa dela gaur egun Akademiaren osaeran nahikoa ordezkatuta ez dagoen gizarteko segmentu baten ikuspegia kontuan hartzea, hain zuzen ere: beren ibilbide profesionalaren hasieran, dela arlo zientifikoan dela artistikoan dela enpresari dagokionean, sektore publikoan eta pribatuan bikaintasuna agertu duten gazteena.

Jakiundek uste du gizartean talentu handia dagoela, eta gaur egun ez duela gizarte-eztabaidan parte hartzen, balioa ekar diezaiokeen arren. Hori dela eta, talentu hori Akademiako eztabaidetan sartzea erabaki du.

Egoera hori ez da Jakiunderena soilik (berri den Akademia da). Aitzitik, Akademia gehienei eragiten die, bereziki, Europakoei, haien antzinatasuna eta duten tradizioa edozein dela ere.

Horregatik, gogoeta-prozesu baten ondoren, Jakiundek, azaroaren 11ko bere osoko bilkuran, hamar jakitun urgazle gazte Akademiako kide egitea erabaki zuen.

Hamar hautatuak Jesus M. Ugalde Jakiundeko lehendakariarekin bildu ziren lehen aldiz, Akademiaren lan-bulegoan, Miramar Jauregian, Jakiunden beteko duten lanari ekiteko.